Benvida ao CiMUS
Benvidos a unha nova edición presencial da Xornada de Portas Abertas do CiMUS.
Obradoiros Ciencia divertida
(recomendada para público infantil de 6-12 anos)
- Saúde bucodental: elaboración dun dentífrico natural.
- Observando como científicos: células animais e vexetais.
- Hixiene: fabricamos un xabón personalizado.
- Xenerador de electricidade estática Van de Graff. O corpo humano como circuíto divertido.
Charlas divulgativas *
- 10:00 “É o autismo un trastorno de base xenética?” Ángel Carracedo.
- 12:00 “Cancro e envellecemento” Fernando Domínguez.
- 16:00 “Modificacións químicas do ARN: vacina do COVID-19 e moito máis” Diana Guallar.
- 18:00 “A que ritmo envellecemos?” Olga Barca Mayo.
* As charlas son en formato híbrido: presenciais e retransmitidas en streaming a través da canle de Youtube do CiMUS
Visita ao laboratorio: Plataforma Innopharma
Visita aos laboratorios da Plataforma Innopharma localizados no CiMUS. Innopharma é a Plataforma de Cribado de Fármacos e Farmacoxenómica da Universidade de Santiago de Compostela adicada ao descubrimento de fármacos, dirixida pola Dra Mabel Loza e o Dr. Ángel Carracedo.
Se non é posible a visita presencial nesta xornada, non perdas a ocasión de facer a visita virtual.
Obradoiros de divulgación
(recomendados para público adolescente e adultos)
-
O cerebro nas túas mans
Neste obradoiro ensinarémosche as neuronas e outras células do sistema nervioso que forman a glía. Todas elas se organizan para formar as distintas partes do sistema nervioso, que ti mesmo poderás montar e desmontar: o cerebro nas túas mans.
Este ano celébrase o "Ano de Investigación Santiago Ramón y Cajal", considerado o ‘pai da neurociencia’ e descubridor das neuronas. Se queres saber máis del, contámoscho neste obradoiro. #AñoCajal
-
Como falan as neuronas?
Abracadabra: chispas … esa é a solución á pregunta.
O idioma internacional non é o inglés, senón as diferenzas de potencial das membranas das neuronas e a electrofisioloxía, a Pedra Rosetta que nos permite traducir e entender como falan entre elas.
Neste obradoiro vivirás en primeira persoa como se transmite o impulso nervioso.
-
O Muro do cerebro: a barreira hematoencefálica contra os camiñantes brancos
Sabías que os vasos sanguíneos do cerebro poderían cubrir a distancia entre Santiago de Compostela e Madrid?
Os vasos sanguíneos cerebrais son os encargados de levarlle ó cerebro osíxeno e nutrientes, á vez que limitan a entrada de substancias tóxicas. O dano nas paredes dos vasos está relacionado con numerosas enfermidades neurolóxicas, polo que é imprescindible contar con ferramentas para a súa protección.
Neste taller veremos a estrutura do cerebro e diferentes métodos para manter o seu correcto funcionamento.
-
Quen é a estufa na casa?
Sabes como de quente está o teu corpo ou como podemos medir a temperatura corporal sen usar un termómetro?
A cámara termográfica ofrece imaxes infrarroxas que indican mediante unha escala de cores a temperatura á que está cada parte do corpo.
Ven e deixa que che saquen unha foto especial. Neste taller explicaremos a utilidade desta tecnoloxía no estudo da graxa parda (a boa) e a obesidade.
-
A locomotora da vida
"Cando unha porta se pecha, ábrese outra”. Sabes que o teu corazón o fai de forma rítmica 100.000 veces ao día, bombeando máis de 7.500 litros de sangue sen parar! Podería encher o depósito do teu coche máis de 100 veces! Pero, que pasa cando algo sae mal?…
Neste obradoiro amosarémosche a estrutura do corazón e como funciona. Veremos os problemas máis frecuentes e a mellor forma de coidalo.
-
Patólogo por un día
Convértete en científico visualizando tecidos de tumores da tiroides ao microscopio. Ademais, poderás actuar como un verdadeiro patólogo de laboratorio vendo a proliferación de células para clasificar tumores en benignos ou malignos.
Grazas á xenerosidade de pacientes, contamos co banco TIROCHUS, que contén todo o espectro de enfermidades da tiroides e que fan posible a investigación
Tour virtual 360º ao centro
Vén coñecer por dentro as nosas instalacións e os equipamentos cos que conta un centro de investigación en Biomedicina. Agora esta experiencia virtual en 3 idiomas.
cimus360.usc.gal/visita-virtual
