A investigación de excelencia da USC abre as súas portas á cidadanía galega

A Rede de Centros Singulares de Investigación (RCSI) da Universidade de Santiago de Compostela (USC) celebrará o vindeiro sábado 16 de novembro unha xornada de divulgación para tódolos públicos destinada a mostrar á sociedade o labor de excelencia que realizan os catro centros da rede (CiQUS, CiMUS, CiTIUS e IGFAE). Un percorrido por este ecosistema científico permitirá coñecer de primeira man o valor engadido que esta rede está a achegar á mellora da calidade de vida das persoas, non só na nosa contorna máis próxima, senón tamén a nivel global. Entre as actividades que poderán atopar os visitantes ao longo do día figuran obradoiros de robótica, visitas a laboratorios, experimentos no eido da química, a biomedicina e física ou numerosas demostracións, que amosarán algúns dos adiantos e sistemas desenvolvidos no marco de traballo dos centros.

CiQUS

Química Biolóxica e Materiais Moleculares

A Química é unha das ferramentas máis poderosas coas que conta a sociedade para afrontar os desafíos do século XXI. Cada día, o compromiso dos investigadores do CiQUS permite explorar novas aplicacións en campos como a saúde (Química Biolóxica e Médica), ou a industria (Materiais Funcionais, Catálise). En só oito anos o centro tense consolidado como referente de investigación interdisciplinaria na fronteira entre a Química, a Biomedicina e a Ciencia de Materiais.

CiMUS

Medicina Molecular e Enfermidades Crónicas

O CiMUS traballa na prevención, comprensión e tratamento das enfermidades crónicas en áreas como Cancro, Endocrinoloxía, Cardiovascular, Neurociencias, Xenética e Bioinformática, Nanomedicina ou Desenvolvemento de Fármacos. Xunto co Hospital Clínico Universitario de Santiago, o centro está integrado no IDIS, un Instituto de Investigación Sanitaria acreditado polo Ministerio de Sanidade.

CiTIUS

Tecnoloxías Intelixentes

O CiTIUS traballa no desenvolvemento dunha nova xeración de tecnoloxías intelixentes que integren a Intelixencia Artificial (IA) nos diferentes niveis existentes entre o mundo físico e o cognitivo. O obxectivo é tirar proveito das potencialidades da IA na resolución de problemas cada vez máis complexos e poñela ao servizo das persoas, garantindo a trasparencia e a confiabilidade. Entre as súas múltiples aplicacións figuran eidos como a saúde, a industria, o transporte ou as cidades intelixentes.

IGFAE

Física de Partículas, Astropartículas e Nuclear

O Instituto Galego de Física de Altas Enerxías é un centro acreditado como Unidade de Excelencia “María de Maeztu” cuxas áreas de investigación tentan responder moitas das preguntas esenciais da natureza física: o estudo da realidade microscópica a nivel fundamental (Modelo Estándar), a conexión entre física de partículas e cosmoloxía, e a estrutura nuclear e as aplicacións médicas. Desde a súa fundación, a colaboración en grandes infraestruturas internacionais como CERN forma parte do ADN do IGFAE.

VEN E DESCOBRE A CIENCIA DE EXCELENCIA

REQUISITOS

A participación nesta xornada require inscrición previa (completamente gratuíta) a través do formulario web disposto a continuación antes do luns día 11 de novembro ás 16:00. As prazas están limitadas.

O programa completo permite a visita aos catro centros ao longo do día, elixindo entre dúas quendas pola mañá e dúas pola tarde por cada centro. As persoas que estean interesadas en visitas máis curtas, poden elixir só visitar tres, dous ou un único centro no horario que desexen.

Os menores de 15 anos só poderán permanecer no interior dos centros baixo a responsabilidade dun adulto (máximo 2 menores/adulto). As actividades están dirixidas a nenos e nenas de 6 anos ou máis, e os máis pequenos deberán estar acompañados sempre por un adulto responsable (non precisan inscrición).

As prazas están todas esgotadas, polo que as inscricións están pechadas.
Química Biolóxica e Materiais Moleculares
Actividades programadas
Benvida ao centro. "Infiltrados no laboratorio" - visita as nosas instalacións. "Conversas cos nosos investigadores" - descobre e pregunta. "Paneis científicos" - as nosas liñas de investigación. "Xogando coa Química" (recomendado para o público infantil)
 
Medicina Molecular e Enfermidades Crónicas
Actividades programadas
Benvida ao centro. Charla divulgativa. Visita a laboratorios/obradoiros. 'Encontros co experto'. Obradoiro de Biomedicina divertida (público infantil, maiores de 6 anos).
 
Tecnoloxías Intelixentes
Actividades programadas
Benvida ao centro. Visita aos demostradores tecnolóxicos. Charla divulgativa. Intelixencia Artificial para a pilotaxe de Scalextric (público infantil, maiores de 8 anos). Demostracións no eido da robótica (público infantil, maiores de 8 anos). Obradoiro de robótica educativa (público infantil, maiores de 6 anos). Demostración de Realidade Virtual (maiores de 10 anos).
 
Física de Partículas, Astropartículas e Nuclear
Actividades programadas
Benvida ao centro. Charla divulgativa (turno 2 e 4) e demostracións no eido da física (turno 1 e 3). Visita a laboratorios. Obradoiros de física de partículas (público infantil, maiores de 6 anos).

Nas redes sociais poderás atopar máis información do evento
cienciasingular cienciasingular