Nesta novena edición de Ciencia Singular o CiQUS, CiMUS, CiTIUS, IGFAE e CRETUS abrirán as súas portas á cidadanía unha vez máis para celebrar o seu meirande encontro de divulgación anual, que convida a familias e visitantes de tódalas idades a achegarse á investigación de excelencia desenvolvida no ecosistema científico da Rede de Centros Singulares da USC.

Para manterte ao día, podes seguir as redes sociais de Ciencia Singular en Instagram (@cienciasingular).

Actividade financiada polo Convenio de Colaboración entre a Consellería de Educación, Ciencia, Universidades e Formación Profesional da Xunta de Galicia e a USC:

• USC
• Consellería de Educación, Ciencia, Universidades e Formación Profesional da Xunta de Galicia

A Química é unha das ferramentas máis poderosas coas que conta a sociedade para afrontar os desafíos do século XXI. Cada día, o compromiso dos investigadores do CiQUS permite explorar novas aplicacións en campos como a saúde (Química Biolóxica e Médica), ou a sustentabilidade (Materiais Funcionais, Catálise). Desde o comezo da súa actividade, no ano 2011, o centro tense consolidado como referente de investigación interdisciplinaria na fronteira entre a Química, a Biomedicina e a Ciencia de Materiais.

O CiMUS ten como obxectivo promover o desenvolvemento da investigación interdisciplinar no campo das ciencias biomédicas. Nos últimos dez anos converteuse nun centro de referencia na conexión de ciencia básica e aplicada das enfermidades crónicas de alto impacto social.

A súa actividade científica estrutúrase en dous programas que interactúan entre sí:

1. O Programa de Medicina Molecular que investiga os mecanismos moleculares de enfermidades crónicas (metabólicas/obesidade, cardiovasculares, neurolóxicas e cancro)
2. O Programa Integrativo Traslacional, que investiga novos fármacos, novas estratexias terapéuticas e xenómica (cribado de fármacos, nanodelivery, medicina xenómica e radioterapia/teragnóstica)

O CiTIUS traballa no desenvolvemento dunha nova xeración de tecnoloxías intelixentes que integren a Intelixencia Artificial (IA) nos diferentes niveis existentes entre o mundo físico e o cognitivo. O obxectivo é tirar proveito das potencialidades da IA na resolución de problemas cada vez máis complexos e poñela ao servizo das persoas, garantindo a trasparencia e a confiabilidade. Entre as súas múltiples aplicacións figuran eidos como a saúde, a industria, o transporte ou as cidades intelixentes.

O Instituto Galego de Física de Altas Enerxías (IGFAE) é un centro creado en 1999 para coordinar a investigación co Laboratorio Europeo de Física de Partículas (CERN), en Xenebra. Na actualidade traballa e colabora coas infraestruturas científicas máis importantes do mundo como GSI/FAIR en Alemaña, o Observatorio Pierre Auger na Arxentina ou LIGO nos Estados Unidos. Conta tamén cunha importante actividade en Física Teórica.

CRETUS procura o diagnóstico, desenvolvemento tecnolóxico e avaliación de solucións, para abordar dun xeito holístico retos ambientais ambiciosos a través dunha cooperación interdisciplinar. A investigación de CRETUS combina as capacidades de diferentes áreas das Ciencias Experimentais (ecoloxía, ecotoxicoloxía, modelización, química analítica e ambiental), Ciencias Sociais (dereito ambiental, economía e psicoloxía social), Humanidades (arqueoloxía) e Enxeñaría (biotecnoloxía e enxeñaría ambiental e de procesos).

A súa axenda científica estrutúrase en 3 prioridades:

1. Auga Segura
2. Solos Saudables
3. Cidades e Industrias Sostibles